ពិធីបើកសិក្ខាសាលាអភិវឌ្ឍន៍សមត្ថភាពមន្ត្រីវាយតម្លៃគុណភាពអប់រំឧត្តមសិក្សា ស្តីអំពី «ស្តង់ដាជាតិសម្រាប់ការទទួលស្គាល់គុណភាពអប់រំកម្រិតគ្រឹះស្ថានឧត្តមសិក្សា»
ខេត្តកំពង់ចាម៖ នាថ្ងៃទី២៧ ខែកក្កដា ឆ្នាំ២០២៦ គណៈកម្មាធិការទទួលស្គាល់គុណភាពអប់រំនៃកម្ពុជា (ACC) នៃក្រសួងអប់រំ យុវជន និងកីឡា បានចាប់ផ្តើមបើកដំណើរការ «សិក្ខាសាលាអភិវឌ្ឍន៍សមត្ថភាពមន្ត្រីវាយតម្លៃគុណភាពអប់រំឧត្តមសិក្សា ស្តីពីស្តង់ដាជាតិសម្រាប់ការទទួលស្គាល់គុណភាពអប់រំកម្រិតគ្រឹះស្ថានឧត្តមសិក្សា» នៅសាលសន្និសីទ នៃសាខាសាកលវិទ្យាល័យ ឯកទេស នៃកម្ពុជា ខេត្តកំពង់ចាម។
ពិធីបើកអង្គសិក្ខាសាលានេះ បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត រ័ត្ន ឆាង ដោយមានការចូលរួមពីមន្ត្រីវាយតម្លៃគុណភាពអប់រំឧត្តមសិក្សា និងសមាសភាពពាក់ព័ន្ធជាច្រើនរូប។
ថ្ងៃដំបូងនៃអង្គពិធីបើកនេះ សិក្ខាកាមទាំងអស់បានទស្សនានិងស្ដាប់បទបង្ហាញយ៉ាងស៊ីជម្រៅពី ឯកឧត្តមបណ្ឌិត រ័ត្ន ឆាង លើប្រធានបទសំខាន់ៗពីរ៖
១. ស្តង់ដាទី១៖ ការប្រមូល វិភាគ និងបកស្រាយទិន្នន័យ និងព័ត៌មានទាក់ទងនឹងសូចនាករនៃស្តង់ដាទី១ ដោយផ្អែកលើភស្តុតាង ព្រមទាំងការអនុវត្តសរសេររបាយការណ៍លទ្ធផលវាយតម្លៃបែបវិភាគគ្រប់ជ្រុងជ្រោយ។
២. ស្តង់ដាទី២៖ ការប្រមូល វិភាគ និងបកស្រាយទិន្នន័យលើសូចនាករនៃស្តង់ដាទី២ និងការអនុវត្តសរសេររបាយការណ៍វាយតម្លៃ។
សិក្ខាសាលានៅថ្ងៃទី១ នេះបានបញ្ចប់ទៅដោយរលូន និងទទួលបានការចូលរួមយ៉ាងសកម្មពីសិក្ខាកាម។ សិក្ខាសាលានឹងបន្តការពិភាក្សាក្រុមលើការប្រមូលទិន្នន័យ និងការសរសេររបាយការណ៍សម្រាប់ថ្ងៃបន្ទាប់ទៅលើ ស្តង់ដាទី១ ដល់ ស្តង់ដាទី៩
សិក្ខាសាលាពិគ្រោះយោបល់ថ្នាក់ជាតិ ស្ដីពីការកែលម្អស្ដង់ដាជាតិសម្រាប់ការទទួលស្គាល់គុណភាពអប់រំកម្រិតគ្រឹះស្ថានឧត្តមសិក្សា និងកម្រិតកម្មវិធីដោយផ្អែកលើស្ដង់ដា AUN-QA ជាគោល
លើកកម្ពស់គុណភាពឧត្តមសិក្សាកម្ពុជា ឆ្ពោះទៅកាន់ស្ដង់ដាអាស៊ាន (AUN-QA)
ភ្នំពេញ៖ នាព្រឹកថ្ងៃទី៩ ខែកក្កដា ឆ្នាំ២០២៦ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីក្នុងពិធីបើក «សិក្ខាសាលាពិគ្រោះយោបល់ថ្នាក់ជាតិ ស្ដីពីការកែលម្អស្ដង់ដាជាតិសម្រាប់ការទទួលស្គាល់គុណភាពអប់រំកម្រិតគ្រឹះស្ថានឧត្តមសិក្សា និងកម្រិតកម្មវិធីដោយផ្អែកលើស្ដង់ដា AUN-QA ជាគោល» នៅវិទ្យាស្ថានជាតិអប់រំ ដោយមានការចូលរួមពីថ្នាក់ដឹកនាំ គ.ទ.ក (ACC) គ្រឹះស្ថានឧត្តមសិក្សារដ្ឋ-ឯកជន និងភាគីពាក់ព័ន្ធជាច្រើន។
🎯 គោលបំណងសំខាន់នៃសិក្ខាសាលា៖
- ប្រមូលធាតុចូល ដើម្បីធ្វើបច្ចុប្បន្នភាព និងកែលម្អស្ដង់ដាអប់រំជាតិឱ្យកាន់តែគ្រប់ជ្រុងជ្រោយ។
- កសាងស្ពានចម្លង ពីស្ដង់ដាជាតិទៅកាន់ស្ដង់ដាតំបន់អាស៊ាន (AUN-QA) ដើម្បីជំរុញការទទួលស្គាល់តម្លៃសញ្ញាបត្រ ការផ្ទេរក្រេឌីត និងការចល័តរបស់និស្សិតនិងសាស្ត្រាចារ្យ។
- ធ្វើទំនើបកម្មប្រព័ន្ធអប់រំជាន់ខ្ពស់ ឱ្យមានភាពប្រកួតប្រជែងជាអន្តរជាតិ ឆ្លើយតបនឹងទីផ្សារពលកម្ម ការអភិវឌ្ឍសេដ្ឋកិច្ចសង្គម និងការវិវឌ្ឍយ៉ាងលឿននៃបច្ចេកវិទ្យាបញ្ញាសិប្បនិម្មិត (AI)។
💡 ក្នុងឱកាសនោះ ឯកឧត្តមឧបនាយករដ្ឋមន្ត្រី បានកោតសរសើរដល់ក្រុមការងារទាំងរដ្ឋនិងឯកជន ហើយបានសង្កត់ធ្ងន់ពី “ភាពចាំបាច់នៃការកាត់បន្ថយគម្លាតរវាងស្ដង់ដាជាតិ និងអន្តរជាតិ” ដោយផ្ដោតលើកម្មវិធីសិក្សាដែលជាសក្ដានុពលរបស់សាកលវិទ្យាល័យនីមួយៗ។ ឯកឧត្តមក៏បានលើកទឹកចិត្តឱ្យគ្រប់ភាគីចូលរួមផ្ដល់ធាតុចូលឱ្យអស់ពីលទ្ធភាព ដើម្បីឱ្យសិក្ខាសាលានេះក្លាយជាត្រីវិស័យក្នុងការបណ្ដុះបណ្ដាលធនធានមនុស្សឆ្លើយតបនឹងតម្រូវការឧស្សាហកម្ម និងការអភិវឌ្ឍជាតិប្រកបដោយចីរភាព។
#ក្រសួងអប់រំ #ឧត្តមសិក្សាកម្ពុជា #AUNQA #គុណភាពអប់រំ #ACC
